Ադրբեջանական զինուժի՝ գրեթե մեկ ամիս շարունակվող կրակոցներից այս գիշեր վնասվել է Սյունիքի մարզի Խնածախ գյուղի մշակույթի տունը:
Պաշտպանության նախարարությունը հաղորդագրությունից բացի նաև լուսանկարներ է հրապարակել, հայտնել՝ կրակոցները հնչել են ժամը 22:20-ի սահմաններում, տուժածներ չկան:
Հայաստանի ռազմական գերատեսչությունը, որ այս շաբաթներին հաճախ է պնդում, թե ադրբեջանական կրակոցները վտանգավոր չեն և ուղղված չեն Հայաստանի տարածքին, Բաքվից պարզաբանում է ակնկալում. – «Ադրբեջանական կողմին կոչ ենք անում հետաքննել Խնածախի մշակույթի տան գնդակոծման փաստը և հանդես գալ հրապարակային պարզաբանումներով»։
Ադրբեջանից դեռ արձագանք չկա, նույն առաջարկը Երևանն արել էր նաև երկու շաբաթ առաջ, երբ ադրբեջանական կրակոցներից Խնածախում տուն էր վնասվել: