Սիրուշոն օրերս փայլեց «Խազեր» մրցանակաբաշխության բեմին՝ Սոնա Ռուբենյանին հանձնելով «Տարվա լավագույն» երգչուհու մրցանակը: Երգչուհին այդ օրվա համար ընտրել էր մարմինն ընդգրկող կարմիր զգեստ, որը վերնամասի հատվածում հետաքրքիր ու նուրբ լուծում ուներ վարդերի տեսքով: Զգեստի հեղինակը Մերի Ստեփանյանն է, եւ ինչպես պատմում է Սիրուշոն՝ այն ոգեշնչված է մի զգեստից, որը ժամանակին կրել է իր մայրիկը՝ Սյուզան Մարգարյանը:
«Վարդերով զգեստն առաջին անգամ տեսել եմ մի երգչուհու հագին, մի ելույթի ժամանակ, ու մինչեւ հիմա հիշում եմ սեւ ու ոսկեգույն վարդերը ու բացվածքը` գեղեցիկ ուսերի վրա:
Մի երգչուհու վրա, ով ոչ միայն ձայնով ու աշխատանքով է ինձ ոգեշնչել, այլ նաեւ կանացիությամբ ու մարդկային տեսակով:
Լավագույն երգչուհու մրցանակը հանձնելիս ուզում էի խորհրդանշել հենց այդ երգչուհուն, ով ինձ համար եղել է լավագույնի վառ օրինակը. մայրս` Սյուզան Մարգարյանը:
Չնայած այդ զգեստը չի պահպանվել, բայց Մերի Ստեփանյանի հետ փորձեցինք նոր շունչ տալ եւ դարձնել կարմիր, ինչպես իր կատարած երգն էր` «Կարմիր ծաղիկ մը գարունի»»,-Instagram-ում հրապարակած ֆոտոշարքին կից գրել է Սիրուշոն:
Երգչուհին հավելել է. «Խորհրդանշական է նաեւ, որ այս մրցանակին բազմիցս արժանանալուց հետո, հիմա ես եմ հանձնում ու այն էլ, մեծ ուրախությամբ, շատ արժանի ու սիրված երգչուհու` Սոնա Ռուբենյանին`իմ ընկերուհու, քրոջ`Վարդուհի Վարդանյանի սանին»:
Երգչուհին նշել է՝ ներկայացված երեք երգչուհիներն էլ արժանի էին այդ մրցանակին: «Վերջիվերջո, ամենամեծ մրցանակը հանդիսատեսի սերն է, առանց որի որեւէ արձանիկ անիմաստ է»: